İsrailin müdafiə naziri əmr verdi

İsrailin müdafiə naziri İsrael Katz hərbçilərə Qəzza sakinlərinin könüllü olaraq anklavı tərk edərək başqa ölkələrə köçməsinə imkan verəcək plan hazırlamağı əmr edib.

 

Oxu24.com  xəbər verir ki, bu barədə Müdafiə Nazirliyinin mətbuat xidməti məlumat yayıb.

 

Katz ABŞ prezidenti Donald Trampın fələstinlilərin köçürülməsi planını alqışladığını bildirib. Onun sözlərinə görə, dünyanın əksər ölkələrində olduğu kimi, fələstinlilərə çıxış və immiqrasiya azadlığı verilməlidir.

 

Nazir qeyd edib ki, plana quru keçidləri ilə çıxış variantları, habelə dəniz və hava yolu ilə çıxış üçün xüsusi tədbirlər daxildir.

 

Yanvarın 26-da Tramp bildirib ki, o, qonşu ölkələrdə, xüsusilə Misir və İordaniyada evlərini itirmiş Qəzza sakinlərinin köçürülməsini mümkün hesab edir. O qeyd edib ki, bu barədə artıq İordaniya kralı II Abdullah ilə danışıb.

 

Fevralın 5-də Tramp fələstinlilər oradan qonşu ölkələrə köçürüldükdən sonra Qəzza zolağına nəzarəti ələ keçirmək niyyətində olduğunu açıqlayıb. Netanyahu ilə keçirdiyi mətbuat konfransında o, ABŞ-ın regionun yenidən qurulması və iş yerlərinin yaradılması, həmçinin partlamamış hərbi sursat və digər silahlardan yaranan təhlükənin aradan qaldırılmasına cavabdeh olacağını vəd edib.

 

Nigar